Basha: Po sulmohet opozita, pas skandalit të fshehjes së kërkesës së Interpolit
Kryetari i Partisë Demokratike, Lulzim Basha ka akuzuar kryeministrin Rama se po sulmon opozitën pas skandalit të paprecedent ku është zhytur në fshehjen e kërkesës së Interpol Brukselit për deputetin e tij.
Kryetari i PD-së, Basha në një njoftim për media shprehet se “Kryeministri i kriminalizimit kërkon të bëhet patjetër qesharak me sulmet dhe kërcënimet ndaj opozitës, pas skandalit të paprecedent ku është zhytur këmbë e duar me fshehjen e kërkesës së Interpol Brukselit për deputetin e tij. Skandali që ka ndodhur është një minë në themelet e policisë, të drejtësisë dhe të shtetit”.
“Kriminalizimi është vepra e vetme e kryeministrit Rama, njeriut që përzgjodhi me dorën e tij miqtë e tij të punëve të pista e me të shkuar kriminale që i kishte në krah deri dje. Miq për kokë , që i përdori për të ardhur në pushtet, dhe ndau me ta pushtet deri kur përplasja e madhe për hesape e pazare doli jashtë fisit. Rrugët e tre shokëve nuk u ndanë për asnjë parim apo moral. Rrugët e tre shokëve u ndanë vetëm se ligjësitë e mafias janë të tilla”, përfundon deklaratën Basha.
