Bashkia e Tiranës: Çmimet për shpronësimet te Bulevardi i Ri janë përcaktuar me VKM

Bashkia e Tiranës reagon pas protestave të banorëve, banesat e të cilëve preken nga projekti i Bulevardit të Ri.

Bashkia thekson se është e gatshme të ndihmojë të gjitha familjet që preken nga ky projekt, brenda hapësirave ligjore, por sqaron se vendimi për shpronësimin e tyre është marrë nga Këshilli i Ministrave që në nëntorin e vitit 2013.

Referuar këtij vendimi, Bashkia e Tiranës sqaron edhe një herë se ajo është përcaktuar vetëm që të shpërndajë dëmshpërblimet për pronarët dhe poseduesit e pasurive të paluajtshme, sipas masës përkatëse të përcaktuar në Vendimin e Këshillit të Ministrave.

“Roli i Bashkisë së Tiranës në këtë proces është të dëmshpërblejë familjet sipas tabelës shoqëruese të VKM-së nr. 752, datë 5.9.2013, dhe nuk ka asnjë funksion në përcaktimin e çmimit të shpronësimeve. Bashkia e Tiranës mbetet e hapur të komunikojë me përfaqësuesit e familjeve të prekura nga shpronësimet për alternativën e propozuar prej saj, duke ofruar si zgjidhje për strehimin e familjeve e shpronësuara banesa sociale ose bonus qeraje”, sqaron Bashkia e Tiranës.

Lidhur me këtë çështje Bashkia e Tiranës ka zhvilluar disa takime me përfaqësuesit e këtyre familjeve, për t’u dhënë zgjidhje shqetësimeve të tyre.