Bie çmimi, fermerët e Myzeqesë hedhin qepen dhe preshin

Telashet për fermerët e Myzeqesë këtë sezon duket se nuk kanë të mbaruar. Pas dëmit ekonomik që iu shkaktua nga infeksioni i rënë në sera, këtë herë fermerët po hedhin në kanale me dhjetëra kuintal qepë e presh. Më të dëmtuarit janë fermerët e Qerretit dhe Kashtëbardhës.

Prej disa ditësh në kanalet e kësaj zone gjen pirgje me qepë e presh të hedhur nga kultivuesit. Sipas tyre mungesa e tregut dhe çmimi jo i favorshëm ka bërë që i gjithë prodhimi të shkojë dëm. Ndryshe nga disa vite më parë kur çmimi i preshit arrinte rekorde duke u shitur me 2 mijë lekë të vjetra, tashmë ai ka rënë në nivelin e 10 lekëve. Me këto çmime fermerët  thonë se nuk arrijnë të nxjerrin as lekët e shpenzimeve që kanë hedhur për të mbjellë këto sipërfaqe.

Veç kësaj sipërfaqje të shkulur fermerët thonë se janë dhe me dhjetëra hektar tokë të mbjella me këto kultura të cilat në rast se nuk do të gjejnë tregje do të kalbet dhe do të groposet. Asnjë nga përfaqësuesit e pushtetit qendror dhe lokal nuk iu është afruar këtyre fermerëve për t’i ndihmuar në këtë situatë që për ta po kthehet në katastrofike.