Bllokohen eksportet e naftës. Prokuroria mbyll “Petroliferën” pas ndotjes së detit
Mbyllja e “Petroliferës” pas derdhjes së naftës në Zvërnec ka sjellë dhe një pasojë tjetër jo të vogël ekonomike, duke çuar në bllokimin e plotë të eksporteve të naftës nga Shqipëria.
Përveçse terminali më i madh, “Petrolifera” është edhe porta kryesore e eksporteve të naftës për shkak të avantazheve jo vetëm logjistike, por edhe në kosto, të cilat burojnë nga afërsia e këtij terminali me vendburimet më të mëdha të naftës në vend.
Por një javë më parë, pikërisht gjatë ngarkimit të një anijeje me naftë bruto, pati një incident që përfundoi me derdhjen e naftës në det dhe ndotjen e 5 kilometrave vije bregdetare në plazhin e Zvërnecit.
Menjëherë pas ngjarjes, terminali është bllokuar nga Prokuroria, e cila është duke kryer procedurat hetimore. Por bllokimi ka çuar edhe në pezullimin e eksporteve të naftës.
Shqipëria eksporton rreth 20 mijë fuçi naftë bruto në ditë. Eksportuesit më të mëdhenj të naftës thonë se, aktualisht të gjithë sasinë e prodhuar janë duke e magazinuar në depozitat e karburanteve. Por, sipas tyre, kjo situatë nuk mund të vazhdojë edhe për shumë ditë, për shkak se po mbarojnë kapacitetet magazinuese.
Sipas tyre, nëse situata nuk zhbllokohet, brenda pak ditësh ata do të fillojnë të ulin prodhimin e naftës në vend, deri në ndalimin e plotë.
