BSH: Kallëzim penal ndaj dy punonjësve në Departamentin e Emisionit

Banka e Shqipërisë, ka bërë sot kallëzim penal për shtetasit A.B dhe M.B, punonjës të këtij institucioni në Departamentin e Emisionit.

Sipas njoftimit të publikuar në faqen zyrtare të Bankës Qendrore, “këta shtetas akuzohen për përvetësimin e vlerave monetare në ngarkim. Materialet dhe të gjitha provat e tjera në ngarkim të të kallëzuarve i kanë kaluar Prokurorisë së Rrethit Gjyqësor Tiranë, e cila ka regjistruar procedimin penal dhe po vijon me intensitet hetimet”.

Në përmbushje të detyrimit ligjor të ruajtjes së sekretit shtetëror dhe të sekretit hetimor informacioni i detajuar rreth ngjarjes është i klasifikuar, thuhet në deklaratën e BSH-së për këtë çështje.