Bushati-Venizellos: Zgjidhja e toponimeve, dëshmi e vullnetit për të ecur përpara

Në kuadër të Ministerialit të NATO-s që po zhvillohet në Bruksel, Ministri i Punëve të Jashtme, Ditmir Bushati zhvilloi një takim dypalësh me homologun e Greqisë, Evangjelos Venizellos.

Gjatë takimit me Ministrin Venizellos të dy Ministrat vlerësuan ecurinë e marrëdhënieve dypalëshe si dhe shprehën vlerësimin për gjetjen e zgjidhjes së toponimeve si një dëshmi konkrete e vullnetit për të ecur përpara dhe si një çështje me impakt të drejtpërdrejtë për qytetarët.

Të dy Ministrat shprehën kënaqësinë për riaktivizimin e komisioneve dypalëshe si mekanizma reale për te zgjidhur çështjet me të cilat përballen qytetarët dhe si katalizatorë të cilët i shërbejnë ndërtimit të besimit reciprok mes palëve.

Ata shprehën rëndësinë që kanë trajtimi i të gjitha çështjeve në kuadër të realiteteve të reja në përputhje me frymën e fqinjësisë së mirë dhe përkatësisë evropiane të të dy vendeve njëherësh anëtare të NATO-s.

Ministri Bushati shprehu falënderimet e tij për mbështetjen që Greqia i ka dhënë Shqipërisë në proceset integruese.