Buxheti 2017, qeveria ngurtëson 22 mln euro nga investimet kapitale

Shpenzimet kapitale janë më të riskuarat për shkurtim vitin e ardhshëm, nëse të ardhurat e programuara nuk do të grumbullohen sipas parashikimeve.

Ligji i buxhetit të 2017 ka sanksionuar se një fond prej 3 miliardë lekësh ose më shumë se 22 milionë euro do të qëndrojë i ngrirë si një kontingjencë për të mbrojtur deficitin buxhetor nga një mosrealizim i mundshëm i të ardhurave.

Për vitin 2017, investimet publike janë planifikuar në masën 4.8% e PBB ose 76 miliardë lekë (duke përfshirë këtu dhe Fondin e Zhvillimit Rajonal prej 9.5 miliardë lekësh, si dhe mbështetjen buxhetore për Sektorin e Energjisë prej 1.5 miliardë lekësh). Ministria e Financave argumenton se, në planifikimin e investimeve për vitin 2017 janë mbajtur në konsideratë të gjitha detyrimet kontraktuale për projektet e investimeve me financim të huaj dhe të brendshëm të trashëguara nga viti 2013 dhe më parë.

Për sa i takon strukturës së investimeve në raport me statusin e projekteve të programuara për financim, vlerësohet se rreth 84,9% e vlerës së investimeve gjithsej të planifikuar në PBA për vitin 2016 shkon për financimin e projekteve në vazhdim.

Edhe më 2016 u ndoq e njëjta praktikë, kur qeveria  ngriu 2.5 miliardë lekë, rreth 18 milionë euro nga shpenzimet kapitale, të cilat u hoqën nga fondi i investimeve në ndryshimet që ju bënë buxhetit të shtetit gjatë shtatorit me aktin e parë normativ.

Shpenzimet kapitale për vitin 2016 do të arrijnë shifrën më të ulët në dekadën e fundit, në pak se 60 mld lekë.

Me gjithë fondet në ulje vit pas viti, edhe ato nuk po mund të realizohen. Qeveria e ka shndërruar në traditë shkurtimin e fondeve të investimeve në mes të vitit. Edhe këtë vit, plani i investimeve publike shkurtoi fondet për këtë zë. Por gjithashtu nuk ka edhe një përdorim eficent të tyre.

Ministria e Financave  ka ngritur njësinë e re të politikës fiskale, e cila ka marrë rolin udhëheqës për të adresuar dobësitë në të ardhura në  parashikimin dhe monitorimin e tyre. Kjo njësi do të zhvillojë një anketë për mënyrën se si janë shpenzuar taksat. Sondazhi do të përfshijë edhe një arsyetim dhe një vlerësim të efikasitetit për secilin zë shpenzimesh.