Certifikim për zejtarët, vlerësimi nga Dhoma e Zejtarëve

Tanimë një bukëpjekës, një përpunes brumi apo dhe zanatçinj të tjerë do të duhet të jenë të certifikuar.

Pas miratimit të ligjit të zejeve së shpejti do të krijohet dhe Dhoma e Zejeve, e cila do të certifikojë një zejtar, por nga ana tjetër do të ndihmojë në ruajtjen e traditës për disa profesione që janë drejt humbjes në Shqipëri.

“S’ka pasur institucion që të certifikojë profesionet. Ti je prodhues i bukës, njëri bën brumin, tjetri e pjek. Njëri duhet të jetë bukëpjekës me certifikatë, përpunuesi me certifikatë. Ata do të kenë mundësi të certifikohen me një certifikatë që njihet edhe në Europë”, deklaroi kryetari i Dhomës së Tregtisë, Luan Bregasi.

Në një takim me zejtarët e Tiranës në Panairin e Punës, ministrja e Ekonomisë, Milva Ekonomi e vlerësoi zejtarinë si një pikë të rëndësishme të zhvillimit të turizmit. Ekonomi theskoi se në zona rurale është vënë re zejtari në kushte ende primitive, që kërkon nxitje dhe mbështetje financiare për t’u zhvilluar.

“Dy janë fonde shumë të rëndësishme, ato për artizanatin dhe ato për start up-et. Fondet e artizanatit janë të dedikuara për ata që merren me art dhe kanë nevojë ta konsumojnë brenda vendit ose ta eksportojnë produktin e tyre. Ndërsa start up-et lidhen me produkte të vogla që reklamojnë një produkt që vjen nga artizanati”, tha Ekonomi.

Për herë të parë është krijuar dhe rrjeti i përfaqësuesve të zejtarisë, të cilët ofrojnë vende pune për të gjithë ata që duan të ruajnë traditën e prodhimeve autentike shqiptare.