Charles III kurorëzohet mbret: Jam këtu për të shërbyer dhe jo për të më shërbyer
Trumpetat u dëgjuan brenda manastirit mesjetar ndërsa pjesmarrësit thirrën “Zot ruaje mbretin!” në një ceremoni ku morën pjesë më shumë se 2000 të ftuar, duke përfshirë udhëheqës botërorë, aristokratë dhe individë të famshëm.
Përshëndetjet me armë u dëgjuan pranë Kullës së Londrës pikërisht në momentin që kurora 360 vjeçare e Shën Eduardit u vendos në kokën e Mbretit ndërsa ai u ul mbi fronin e shekullit të 14-të në Westminster Abbey.
Ngjarja historike dhe solemne daton që nga koha e paraardhësit të Mbretit Çarls III, Uilliam Pushtuesi në vitin 1066.
Mbretit Çarls III, i cili pasoi nënën e tij pasi ajo ndërroi jetë shtatorin e kaluar para kurorëzimit, iu dha një sërë relikesh historike. Mes dhuratave ishte edhe një stoli me diamantin më të madh pa ngjyrë në botë.
Gruaja e dytë e mbretit, Camilla, u kurorëzua gjithashtu mbretëreshë gjatë ceremonisë dy-orëshe.
Sipas traditës, Princi William, djali i madh i mbretit i premtoi besnikëri Çarlsit III.
“Unë, Uilliami, Princi i Uellsit, premtoj besnikërinë time ndaj jush, do e ndaj të vërtetën dhe besimin me ju”….
Mbështetësit e monarkisë u emocionuan kur panë pamjet e para të kurorëzimit, ndërsa karroca mbretërore kaloi para tyre.
“Ne realizojmë ceremonitë më të mira ë botë, dhe sot është një konfirmim fantastik i kësaj”, thotë përkrahësi i mbretërisë britanike, Peter Magerney.
“Jam shumë e emocionuar. Kam ardhur nga Amerika dhe është thjesht shumë emocionuese për mua të jem këtu për kurorëzimin e mbretit Çarls III”, tha Stephanie Abdulahnga Virxhinia e Shteteve të Bashkuara.
Ndërsa festimet e kurorëzimit po vazhdonin, protestuesit kundër monarkisë brohoritën “ti nuk je mbreti im”.
Shumica e protestuesve kundër monarkisë ishin mbledhur në sheshin Trafalgar pranë statujës prej bronzi të mbretit Charles I, të cilit iu pre koka më 1649, duke e kthyer vendin për pak kohë në republikë.
Në fund të ceremonisë, anëtarët e familjes mbretërore dhe të ftuarit e përcollën mbretin e sapo kurorëzuar me këngën “Zot shpëtoje Mbretin”, ndërsa Mbreti Çarls III doli nga kisha Westminster Abbey.
Princi Harry, djali i dytë i Mbretit Çarls mori pjesë në ceremoni pa bashkëshortën e tij, Meghan Markle, Dukeshën e Sussex-it e cila qëndroi në Kaliforni me dy fëmijët e vegjël të çiftit.
Djali i madh i tyre, Princ Archie, mbush katër vjeç në të njëjtën ditë.
Harry dhe Meghan dhanë dorëheqje nga detyrat mbretërore në vitin 2020 dhe u zhvendosën në Kaliforni, duke thënë se donin të krijonin një jetë të re, të pavarur, larg vëzhgimit të shtypit britanik.
Ata ranë dakord me familjen mbretërore që nuk do të merrnin pjesë në asnjë ngjarje apo turne zyrtar të ardhshëm mbretëror dhe janë parë në Britani vetëm në disa raste që kur u larguan, duke përfshirë funeralin e Mbretëreshës Elizabeth, e cila vdiq shtatorin e kaluar pas një mbretërimi 70-vjeçar.
