CIA zbulon se për çfarë kishte pyetur Bush, pak minuta para sulmeve të 11 shtatorit

Në mesin e dokumenteve të inteligjencës amerikane, të quajtura “11 shtator 2001 me Presidentin”, është edhe ai i cili përshkruan ditën e ish-presidentit amerikan, George Bush, gjatë sulmeve terroriste.

Vetëm 30 minuta para se stafi i tij t’i kumtonte sulmin e avionit të parë mbi kullat binjake të Qendrës Tregtare Botërore (WTC), Bush po e lexonte gazetën.

Atij iu afrua zëvendës-drejtori i CIA-s, Michael Morell, ndërsa Bushi e pyeti, “A ka diçka interesante sot?”.

Atëkohë ish-presidenti amerikan dhe stafi i tij ishin në një udhëtim zyrtar. Ishin në hotelin “Longboat Kay” të Floridas.

Presidenti e pyeti stafin e tij a kishin bërë gjumë të qetë dhe a i kanë dëgjuar valët e plazhit. Vetëm disa minuta më vonë, pasuan ngjarjet që do të shënohen si më tragjiket gjatë presidencës së Bushit, por edhe në historinë e re amerikane, transmeton Telegrafi.

Në momentin, gjersa kulla e parë e WTC-së po digjej, presidenti Bush ishte duke shkuar në Shkollën Fillore “Booker” në Sarasota. Në telefonin celular e telefonoi sekretari i Shtëpisë së Bardhë, i cili i konfirmoi lajmin.

“Bush u kthye kah unë dhe më pyeti ‘Michael, din gjë për këtë?’ I thashë jo, ndërsa shtoi se shpreson se ky është një aksident dhe jo një akt terrorist”, rrëfen Morell.

Ndërsa Bush ishte ulur në klasë me nxënësit e klasës së parë, Morell i kumtoi lajmin e sulmit të dytë.

Tani ishte bërë e qartë se Shtetet e Bashkuara po sulmoheshin nga terroristët. Fytyra e Bushit, siç raportoi Morell, u ngri.

“Ishte qetë për pesë minuta në një hapësirë të hapur, kjo ishte një ndjenjë e pakëndshme”, tha Morell.

“Pastaj të gjithë u drejtuan kah avioni presidencial, i cili u kontrollua me kujdes nga frika se edhe ai mund të jetë cak i sulmeve. Gjatë fluturimit për në Luiziana, të gjithë ishin të shqetësuar dhe të tronditur. Presidenti ishte i fortë”, thotë Morell.
“Ai më pyeti se kush mund ta ketë bërë. Unë i thashë se pas sulmit ndoshta është Osama bin Laden dhe Al-Kaeda”, ka thënë Morell