Në një postim në rrjetet sociale, Çuçi bën me dije se gjatë këtij takimi u diskutua mbi rezultatet dhe sfidat në fushën e punëve të brendshme teksa rrugëtimi ynë drejt aderimit të plotë ka marrë një ritëm të ri”.
Ministri shprehet se me diplomatët e Bashkimit Europian ka ndarë edhe vizionin për reformimin e Policisë Kriminale, si një hallkë e rëndësishme në luftën kundër krimit të organizuar.
“Pata mundësinë të diskutoja me ta për çështje që lidhen me Kapitullin 24 në procesin e negociatave me BE-në dhe ndava vizionin tonë për reformimin e Policisë Kriminale, si “kali ynë i betejës” në luftën kundër krimit të organizuar”, nënvizoi Çuçi.
Çështje tjetër e rëndësishme që u diskutua ishte sulmi kibernetik ndaj sistemeve dixhitale të Policisë së Shtetit.
“Shpreha gjithashtu shqetësimin për sulmin kibernetik dhe kërkova mbështetje nga vendet e BE-së për forcimin e sigurisë së sistemeve dixhitale të Policisë së Shtetit”, thotë Ministri i Brendshëm.
Teksa u vlerësuan arritjet e vendit tonë në disa fusha, gjatë diskutimit u vu theksi tek domosdoshmëria e vijimit të angazhimit në procesin e reformave për forcimin e instrumentave kundër krimit të organizuar, korrupsionit dhe çdo forme tjetër paligjshmërie.
“Shqipëria jep një kontribut të qenësishëm në sigurinë e unionit kur vjen puna tek adresimi i sfidave të përbashkëta si flukset migratore të paligjshme; lufta kundër trafikut të drogës; kontrabandimi, trafiku i qënieve njerëzore; pastrimi i parave dhe çdo formë tjetër krimi transnacional”, shprehet ministri Çuçi.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.