Dallas, qëllohen të paktën 11 policë, 3 të vrarë

Të paktën 3 policë u vranë dhe 8 të tjerë u plagosën të enjten mbrëma në qytetin jugor amerikan Dallas të shtetit Teksas, gjatë një tubimi proteste kundër asaj që shihet gjerësisht si përdorim i tepruar force nga policia ndaj dy afrikano-amerikanëve në Minesota dhe Luiziana.

Policia u kërkoi demonstruesve që të largoheshin nga zona në të cilën po qëllohej me armë, jo shumë larg nga vendi ku në vitin 1963 u vra presidenti John Kennedy.

Një person që ndodhej aty në kohën e të shtënave me armë e përshkroi skenën si “kaos i plotë.”

Presidenti amerikan Barack Obama u bëri thirrje forcave të zbatimit të ligjit të eliminojnë paragjykimet racore nga radhët e tyre, duke thënë se “të gjithë ne si amerikanë duhet të na bëjnë të shqetësohemi” vrasjet nga policia të afrikano-amerikanëve këtë javë.

“Ne kemi parë tragjedi si kjo shumë e shumë herë,” tha Presidenti Obama pas mbërritjes të premten në mëngjes në Varshavë për një takim dy-ditor të udhëheqësve të NATO-s. Ai tha se ndihet i detyruar të komentojë për vrasjet me një deklaratë për televizionin – përveç një postimi në Facebook botuar pak orë më parë – duke pasur parasysh “interesimin e jashtëzakonshëm” që kanë ngjallur incidentet.

Dy meshkuj afrikano-amerikanë u qëlluan për vdekje nga policia në Shtetet e Bashkuara gjatë dy ditëve të fundit. Incidentet sërish kanë ngritur pyetje rreth përdorimit të tepruar të forcës nga ana e policisë, veçanërisht kundër pakicave.

Presidenti tha se të gjithë amerikanët duhet të jenë të shqetësuar në lidhje me problemin e të shtënave të shpeshta të policisë ndaj afrikano-amerikanëve, që ai i quajti “shenjë e pabarazive më të gjera racore që ekzistojnë” në sistemin amerikan të drejtësisë.

Ai tha se këto pabarazi vërtetohen nga nga statistikat që tregojnë se afrikano-amerikanët dhe hispanikët trajtohen ndryshe nga policia.
“Kur ndodhin incidente të tilla, një pjesë e madhe e bashkëqytetarëve tanë e ndiejnë se për shkak të ngjyrës së lëkurës ata nuk trajtohen njësoj. Dhe kjo dhemb,” tha Presidenti Obama.

Njerëzit ndezin qirinj për Alton Sterling, i cili u vra nga një polic në Baton Rouge të Luizianës më 6 korrik, 2016.
Njerëzit ndezin qirinj për Alton Sterling, i cili u vra nga një polic në Baton Rouge të Luizianës më 6 korrik, 2016.

5 korrik 2016. Në këtë foto të nxjerrë nga një video, Alton Sterling mbahet nga dy policë, njëri prej të cilëve ka në dorë një revolver
5 korrik 2016. Në këtë foto të nxjerrë nga një video, Alton Sterling mbahet nga dy policë, njëri prej të cilëve ka në dorë një revolver