Dëbohet zyrtarja shqiptare e Ministrisë së Mjedisit, vodhi në Gjenevë
Një gjykatë e Zvicrës ka dëbuar nga ky vend por edhe nga të gjitha shtetet e zonës Shengen një zyrtare shqiptare të Ministrisë së Mjedisit, e cila është kapur duke vjedhur në supermarket.
Lajmin e ka bërë të ditur gazeta zvicerane 20 minutes, e cila për arsye etike nuk përmend emrin e zyrtares, por vetëm thekson se ka qenë një konsulente e Ministrisë së Mjedisit.
Gjykata Administrative Federale (TAF) konfirmoi dëbimin nga territori i Zvicrës.
Zyrtarja, një vajzë e re e diplomuar për inxhinieri, ndodhej në Gjenevë për një konferencë ndërkombëtare në maj të vitit 2015 dhe u kap në një supermarket në qendër të qytetit.
“Malli që ajo kishte futur në çantë, arrintre në një shumë prej 1667 frangash”, shkruan gazeta.
Zyrtarja është denoncuar dhe pastaj dënuar nga drejtësia e Gjenevës me 30 gjoba në ditë me nga tridhjetë franga, një vendim që ajo nuk e ka kontestuar. Por zyrtarja shqiptare ka apeluar kundër vendimit të Sekretariatit Shtetëror për Migrantët (SEM), i cili vendosi një ndalim të hyrjes për një periudhë prej tre vjetësh, jo vetëm për Zvicrën, por për të gjithë zonën Shengen.
Në apelim ka theksuar rëndësinë e madhe që ka për të mundësia për të marrë pjesë në konferenca ndërkombëtare, sepse dënimi mund të rrezikojë karrierën e saj. Por gjykata nuk ka toleruar.
Në vendimin e lëshuar të enjten, gjykatësi vuri në dukje se qëndrimi i këshilltares nuk është i përputhshëm me pritshmëritë prej një zyrtari të lartë që viziton një vend të huaj.
