Deklarata e Metës për Bindjen Demokratike, Patozi: Meta produkt i pazareve të pista politike

Deklarata e Presidentit Ilir Meta për parti të regjistruara në zgjedhje jashtë afateve, duke iu referuar Bindjes Demokratike, solli reagimin e Astrit Patozit. Në një postim në rrjete sociale, ai shprehet se konsideratat negative të Presidentit, i shtojnë votat Bindjes Demokratike, në zgjedhjet e 30 Qershorit.

“I kujtojmë atij se e ka detyrim që të dëgjojë dhe marrë për bazë vetëm atë që thonë institucionet shtetërore dhe jo opinionet e partive politike për njëra-tjetrën, ndaj duhet ta frenojë veten kur të flasë herë tjetër për Bindjen Demokratike. Gjithmonë, në rast se do ta ketë këtë mundësi”, thekson Patozi, duke nënkuptuar iniciativën e shumicës për të shkarkuar në Kuvend, Kreun e Shtetit. Astrit Patozi thekson se “Bindja Demokratike nuk ka asnjë përgjegjësi për krizën politike në vend, krizë që sikundër tha ka si shkak partitë e vjetra, ndërkohë që vet Presidenti i Republikës thekson Patozi, si funksion dhe personazh politik, është produkti me sinjifikativ i pazareve të pista mes tyre”.