Dështimi në UNESCO, Thaçi: Faji i Serbisë dhe opozitës

Zëvendëskryeministri dhe ministri i Jashtëm i Kosovës, Hashim Thaçi ka folur këtë të enjte para kabinetit qeveritar lidhur me dështimin e anëtarësimit të Kosovës në UNESCO.

Thaçi tha se, edhe pse nuk mori votat e mjaftueshme për anëtarësim, Kosova mori mbështetjen e shteteve më liberale dhe demokratike të botës. Ai akuzoi Serbinë se, u soll me Kosovën në këtë proces me fushata të egra, deri në kufi me racizmin.

“Në procesin e anëtarësimit në UNESCO, Kosova u ballafaqua me dy pengesa: e para Serbia, me një fushatë të egër; dhe e dyta opozita bllokuese në Kuvend, e cila për dy muaj dërgoi mesazhe dhe imazhe me gaz lotsjellës në Kuvend”, deklaroi Thaçi.

Ai nënvizoi se gjysma e kohës së Ministrisë së Jashtme shkoi për të lobuar dhe gjysma tjetër për t’u sqaruar shteteve të ndryshme veprimet e opozitës në Parlament.