Detyrim paraqitje Dylit, rilidhi energjinë për djalin e sëmurë. OSHEE: Ka 10,6 mln lekë borxhe

Gjykata e Shkodrës ka dhënë masën e sigurisë detyrim paraqitjeje për Naim Dylin, i arrestuar pak ditë më parë pasi rilidhi energjinë e ndërprerë nga OSHEE.

Në vendimin e saj, gjykata thekson se shkak i ndryshimit të masës së sigurisë nga arrest me burg në detyrim paraqitjeje u bë për shkak të gjendjes shëndetësore të familjes së Dylit.

Rasti i tij u bë publik një ditë më parë pas apelit të bashkëshortes, Eduarta Dyli, e cila rrëfeu se bashkëshorti i saj e rilidhi energjinë për shkak se djali i tyre 7-vjeçar është i sëmurë dhe ka nevojë për pompa me oksigjen për të jetuar.

Rasti solli reagimin e Partisë Demokratike që akuzoi OSHEE për sjellje kriminale dhe antihumane ndaj një kryefamiljari që detyrohet të bëjë një shkelje për të shpëtuar jetën e fëmijës së tij.

Ndërkohë, Operatori i Shpërndarjes së Energjisë Elektrike ka bërë me dije se familja Dyli ka 10, 6 mln lekë borxhe ndaj OSHEE, ndërkohë që ka akuzuar PD se po mbështet paligjshmërinë dhe shkeljen e ligjit siç është edhe vjedhja e energjisë elektrike