Dita e parë e Fitër Bajramit – të hënën

Kryesia e Bashkësisë Islame të Kosovës njofton opinionin e gjerë se muaji i madhëruar i Ramazanit përfundon ditën e diel, më 27 korrik 2014.

Këshilli i Bashkësisë Islame të Kosovës njofton se manifestimi qendror për festën e Fitër-Bajramit për Republikën e Kosovës do të mbahet në Xhaminë e Madhe në Prishtinë.

“Manifestimi fillon në ora 4:50 me faljen e namazit të sabahut, pas të cilit do të jetë ligjërata tematike kushtuar kësaj feste nga Adem ef. Hoxha. Namazi i Fitër–Bajramit falet në ora 6:00 minuta të cilit do t’i prijë, Sabri ef. Bajgora – kryeimami i BIK”, thuhet në njoftimin e BIK.

Gjithashtu shtohet se me rastin e festës së Fitër–Bajramit, ditën e parë të festës, më 28 korrik 2014, myftiu i Kosovës, Naim Tërnava, si tradicionalisht organizon pritje përurimi në selinë e Kryesisë së BIK nga ora 9:00-12:00.

“Kryesia e Bashkësisë Islame të Kosovës të gjithë besimtarëve dhe opinionit të gjerë ua uron festën e Fitër-Bajramit duke e lutur Zotin që t’i ketë pranuar agjërimin, lutjet dhe ibadetet tona. Me fat festa e Fitër-Bajramit!”, përfundohet në njoftimin e BIK-ut.