Dizdari: Më kanë kërcënuar, kërkojnë të marrin qendrën kulturore

Kompozitori Limos Dizdari prej vitesh është vendosur në qytetin e Ksamilit dhe drejton qendrën kulturore “Dea”. Prej 15 vitesh ai e drejton këtë qendër, por ditet e fundit thotë se është kërcënuar me jetë.

“Shqipëria dhe shteti po vuajnë pasojën e figurës së shëmtuar të gjykatave”, deklaron Dizdari.

Historia e pronësisë së qendrës kulturore nis me konfederatat e sindikatave, pushtetin vendor atje si dhe me një kontratë në vitin 2000 mes kompozitorit dhe konfederatave për vënien në funksion të saj.

Në vitin 2007, një person pretendoi pronësinë e objektit me një akt shitjeje të vitit 1992. Sipas kompozitorit, kërcënimet kanë ardhur prej të afërmve të Llambrini Panajotit, e cila pretendon pronësinë.

“Unë do të pyesja një herë Enkelejdën, të shoqen e Rasim Dodës, ish-kryetar i gjykatës, që sot është para gjykatës si njeri i korruptuar e nepotik. Edhe bashkëshortja e tillë është. Mirë që e morët vendimin, është e drejta juaj, por pse s’i lajmëruat të gjitha palët e interesuara? Kjo pronë është e pushtetit vendor? Pse s’më lajmërove kur e ke të renditur në listën kryesore të padisë”, thotë Dizdari.

Vetëm gjatë vitit 2015 qendra “Dea” njihet si organizatorja e rreth 15 koncerteve, eventeve muzikore, konkurseve rajonale e ndërkombëtare si dhe shfaqjen premierë të dokumentarit kushtuar jetës së figurës së Fan Nolit.