Eurodeputetët kritikojnë marrëveshjen për migracionin BE-Turqi

Eurodeputetët kanë kritikuar në mënyrë të ashpër marrëveshjen në parim e përfunduar midis BE-së dhe Turqisë, duke akuzuar liderët evropianë se nuk kanë mundur të distancohen ndaj shantazhit të Ankarasë në këmbim të ndihmës së saj për menaxhimin e krizës migratore.

Nga e djathta në të majtë, të gjelbrit si dhe populistët eurospektikë, një numër i shumtë parlamentarësh kanë hedhur kritika mbi projektmarrëveshjen me Turqinë, duke arritur një marrëveshje konkrete në përfundim të samitit të jashtëzakonshëm dy ditë më parë në Bruksel, dhe “pazaret” që janë bërë pjesë e këtyre bisedimeve.

“Ajo çfarë ne po bëjmë, është hapja e korridoreve kryesore të Evropës ndaj Sulltanit Erdogan. E konsideroj këtë çështje tejet problematike”, u shpreh kreu i deputetëve liberalë, Guy Verhofstadt, gjatë një debati të gjatë frymëzues në sallën ovale në Strasburg.

Liderët evropianë ranë dakort deri në samitin e parashikuar javën e ardhshme për të finalizuar marrëveshjen e re me Ankaranë, e cila do të pranojë në territorin e saj të gjithë kontigjentin e refugjatëve të ardhur në mënyrë të paligjshme në Greqi, duke përfshirë shtetasit sirianë me kusht që evropianët të angazhohen, për secilin e refugjatëve të shoqëruar me dokumenta të rregullta për të transferuar një refugjat nga Turqia drejt territorit të BE-së.