Federica Mogherini synon të përfshihet plotësisht në punën e Komisionit

Shefja e re e diplomacisë evropiane, Federica Mogherini synon të luajë rolin e saj të plotë si zëvendëspresidente e Komisionit, brenda të cilit ajo do të jetë socialistja më e vlerësuar.
“Kam si qëllim të marr pjesë në të gjitha takimet e Komisionit (…) objektivi është i qartë, do të jem përfaqësuesja e lartë për politikën e jashtme dhe zëvendëspresidente e Komisionit ku do t’i ndjek nga afër të gjitha çështjet”, theksoi Mogherini, ministrja aktuale italiane e Punëve të Jashtme, emëruar dy ditë më parë në krye të diplomacisë evropiane, në një intervistë të publikuar sot nga ”Corriere della Sera”.
“Shtoj që do të bëj diçka tjetër: në Komision, jam përfaqësuesja socialiste më e vlerësuar dhe kam si synim të luaj një rol politik”, shtoi ministrja, anëtare e Partisë Demokrate (e majtë, në pushtet).
Duke iu përgjigjur kritikave në lidhje me mungesën e eksperiencës, ministrja italiane, 41 vjeçe, nënvizoi se ishte marrë që prej 20 vitesh vetëm me çështje ndërkombëtare dhe evropiane.
Ajo siguroi se kishte një rrjet të gjërë kontaktesh jashtë vendit. ”Nuk bëhet fjalë për ish-kryeministra apo ish-ministra, por ndoshta për kryeministra të ardhshëm dhe shumë ministra dhe ministre në detyrë”, shtoi Mogherini.
Pyetur për situatën në Ukrainë, ministrja italiane theksoi se ”presidenti rus, Vladimir Putin nuk ka respektuar kurrë angazhimet e ndërmarra në raste të ndryshme dhe që Kremlini reagon kundër interesave të popullit të tij”.
“Është në interes të Ukrainës, Evropës dhe Rusisë që kriza të ketë një zgjidhje politike dhe jo një zgjidhje ushtarake, që thjesht nuk ekziston”, shtoi ajo