Fier: Nis puna për rikonstruksionin e Bulevardit “Jakov Xoxa”

 Kryetari i Bashkisë së Fierit, Baftjar Zeqaj, përmes një konference shtypi, bëri të ditur nisjen e punimeve për zbatimin e projektit për rikonstruksionin e bulevardit “Jakov Xoxa”.
Ky projekt që kap vlerën financiare rreth 204 205 812 lekë dhe që financohet nga qeveria shqiptare është një nga projektet më të mëdha në fushën e planifikimit urban dhe synon krijimin e një ambienti dhe infrastrukture moderne, duke i dhënë pjesës veriore të qytetit fytyrën bashkëkohore.
Puna ka nisur që në orët e para të mëngjesit me spostimin e linjave kabllore dhe prerjen e pemëve. Kompania zbatuese po punon me ritme të shpejta me qëllim përfundimin e kësaj pedonaleje, punime të cilat janë planifikuar për një afat kohor 6 mujor.
“Ky projekt synon në disa drejtime kryesore, ku përfshihet jo vetëm përsosja e infrastrukturës, por edhe ana funksionale, ajo estetike, përmirësimi i qarkullimit dhe mbrojtja mjedisore”, tha Zeqaj.
Sipas tij, projekti do të zgjidhë përfundimisht problemin e shtrirjes së kabujve, të cilët vareshin si rrjetë merimange mbi qytet, nëpërmjet sistemimit të nëndheshëm. Ai do të kufizojë lëvizjen e mjeteve motorrike dhe do të ndërtohet një korsi për kalimin e biçikletave. Fasadat e ndërtesave jo vetëm do të suvatohen e lyhen sipas një plani, por në to do të përshtaten edhe vepra të artit pamor duke e shndërruar këtë peisazhin pranë kësaj shëtitoreje në një vlerë sa kulturore aq dhe relaksuese.
“Do të jetë një bulevard model jo vetëm për qytetin e Fierit, por më gjerë” , u shpreh Zeqaj.
Bulevardi “Jakov Xoxa” është një nga shëtitoret themeluese të qytetit. Tashmë, pas përfundimit të tij, qytetarët e Fierit do të shijojnë më shumë dhe në mënyrë më të qytetëruar nëpërmjet xhirove të mbrëmjes ajrin, frymëmarrjen bukuritë e qytetit.