Filipine: Papa mes stuhisë takohet me të mbijetuar të uraganit Haiyan
Papa Françesku u shprehu sot solidaritetin të mbijetuarve të uraganit Haiyan në Tacloban, qytet i Filipineve i shkatërruar në vitin 2013 nga uragani vdekjeprurës Haiyhan, duke i siguruar ata se nuk ishin braktisur nga Zoti, pak përpara se të largohej më shpejt nga Manila për shkak të një stuhie tropikale.
Dhjetëra mijëra besimtarë ishin mbledhur në një shesh të madh pranë aeroportit, mes shiut dhe erës, për të dëgjuar fjalët e Papës argjentinas.
Me një pamje qe dukej qartë se ishte shumë i prekur, ai u tha se « kur mësova për katastrofën kur isha në Romë, mendova se duhej të vija këtu ».
Papa kritikoi ashpër « plaçkitjet dhe përfituesit », përshëndeti rezistencën dhe bujarinë heroike të shumë filipinasve » dhe i kërkoi qeverisë që « t’i trajtojë si duhet të varfërit në të gjithë vendin”.
Uragani, me një fuqi të padëgjuar, i nëntorit 2013, ka shkaktuar më tepër se 7 000 të vdekur dhe dhjetëra mijëra të prekur në këtë zonë të ishullit Leyte, 650 km nga Manila.
Programi i vizitës së Papës vazhdoi me ritme të shpejtë ndërkohë që stuhia po ashpërsohej. Ai e përshëndeti turmën nga makina ë tij e hapur, u ndal për disa minuta në një familje të varfër peshkatarësh, bekoi pa dalë nga makina një qendër për të varfërit dhe u largua nga aeroporti Tacloban, dy orë përpara nga ç’parashikohej.
