“Fitojnë” infermierët, Gjykata Administrative pezullon testimin. Beqaj: Procesi do shtyhet

Gjykata Administrative vendosi të pezullojë testimin e Ministrisë së Shëndetësisë për infermierët. Pezullimi do të jetë në fuqi deri në gjykimin e çështjes në themel. Vendimi është marrë nga gjyqtarja Alkelina Gazidede, e cila vendosi pezullimin e përkohshëm të testimit, deri në një vendim të dytë pas shqyrtimit të çështjes.

Mes ministrisë së Shëndetësisë dhe infermierëve prej kohësh ka nisur një përplasje. Ministria kërkon që të gjithë infermierët të futen në testim, ndërsa këta të fundit e konsiderojnë si të jashtëligjshëm procesin. Si pasojë e kësaj, Urdhri i Infermiereve Shqiptar, depozitoi padi në Gjykatën Administrative, duke kërkuar shfuqizimin e urdhrit për zhvillimin e testimit dhe pezullimin e zbatimit të urdhrit, për zhvillimin e procesit të vlerësimit në kujdesin spitalor, deri në përfundim të gjykimit të çështjes.

Menjëherë pas shpalljes së vendimit, kreu i shëndetësisë Ilir Beqaj tha se procedurat e testimit do të ‘ngrijnë’ deri sa gjykata të shprehet në themel. Ministri vazhdon të ngulmojë në kryerjen e testimit. “Procedurat e testimit do të ‘ngrijnë’ për aq kohë se gjykata të shprehet në themel për ankimimin e urdhrit. Kemi vendosur që ta shtyjmë testimin. Protestat e infermierëve janë të paligjshme, peticioni i djeshëm nuk është i saktë. Në të ekzistojnë 7 emra të njëjtë”, tha Beqaj.