Fushë Krujë, helmohen 11 punonjëse të një fabrike këpucësh

Njëmbëdhjetë punonjëse të një fabrike këpucësh në Fushë Krujë dyshohet se janë helmuar në punë. Sipas burimeve, gratë i janë drejtuar qendrës mjekësore të Bubqit në Fushë Krujë për të marrë trajtimin mjekësor.

Sipas burimeve, punonjëset patën probleme pasi shkuan në punë, me vështirësi në frymëmarrje dhe marrje mendsh.

Këto shtetase, gjatë orarit të punës në fabrikë, nuk janë ndjerë mirë. Menjëherë janë dërguar në Qendrën Shëndetësore Fushë-Krujë dhe ndodhen nën kujdesin e mjekëve, jashtë rrezikut për jetën.

Nga hetimet paraprake, dyshohet se shkak ka qenë aspirimi jo i mirë dhe efektet negative të çliruara nga lënda e parë e punës ajo që i ka shkaktuar probleme punonjëseve.

Ndërkohë priten specialistë nga Tirana për të përcaktuar shkakun e vërtetë të helmimit, edhe pse mjekët thanë se shkak janë bërë substancat tretëse në fabrikën e këpucëve.