Gashi: Raporti i Williamsonit tepër i paqartë

Avokati Tomë Gashi e ka quajtur raportin e prokurorit Clint Wlliamson me shumë diplomatik sesa të një prokurori të nivelit të tij, duke e parë këtë si rrezikun kryesor. Gashi thotë se hetimi për akuzën sensacionale, po aq sa monstruoze, për kinse trafikim organesh njerëzore qëllimisht nuk është përmbyllur as këtë herë.

Avokati Gashi, i cili mbron ish Komandantin e Shtabit të Përgjithshëm të UÇK-së Sylejman Selimi, thotë se ky raport do t’i mbajë peng edhe për një kohë të pacaktuar udhëheqësit më të lartë të ish UÇK-së.

“Publikimi i sotëm i raportit të ambasadorit dhe prokurorit Clint Wiliamson do të mbajë edhe për një kohë të pacaktuar peng udhëheqësit më të lartë të ish UÇK-së, një pjesë e të cilëve janë, apo pretendojnë të jenë udhëheqës të lart shtetëror të Kosovës. Hetimi për akuzën senzacionale po aq sa MONSTRUOZE, për kinse trafikim organesh njerëzore qëllimisht nuk është përmbyllur as këtë herë. Raporti i Williamson në të njëjtën kohë është tepër i paqartë rreth përgjegjësisë eventuale penale për krime të pretenduara të ish ushtarakëve të UÇK-së,duke pretenduar në të njëjtën kohë se krimet e pretenduara kanë qenë të organizuara nga struktura të caktuara të UÇK-së dhe se hetimi nuk është i drejtuar kundër UCK-se si strukturë ushtarake”, tha Gashi përmes një mesazhi telefonik, transmeton KP.

Avokati Gashi ka shtuar se asgjë nuk ka ndryshuar me këtë raport, madje raportin e quan me shumë diplomatik se sa të nivelit të prokurorit Williamson.

“Unë besoj se njoftimi i sotëm në formë të raportit të Williamson është me tepër raport i një diplomati se sa raporti i një prokurori të nivelit të tij, dhe këtu është rreziku kryesor. Derisa Williamson ta ‘publikojë’ raportin me emra dhe mbiemra, me pozita të tyre në UÇK dhe me postet shtetërore nè Kosovè ,mund të ketë shumë favore në të mirë të ‘raportit’ që do ta ketë emërtimin Aktakuzë, për ta shpëtuar vetën dhe kjo do ta dëmtojë shumë Kosovën si shtet për se paku 10 vitet e ardhshme”, ka shkruar Gashi.