Gjenden në Vlorë motrat Kajtazi, ishin larguar në shenjë hakmarrje ndaj prindërve

Motrat Kajtazi janë larguar nga banesa në shenjë hakmarrje ndaj prindërve të tyre, pasi pretendonin se nuk i trajtonin mirë. Kështu kanë deklaruar në polici Orialda Kajtazi, 18 vjeç dhe K. Kajtazi, 14 vjeçe.

Afërsisht një muaj pas largimit të tyre, policia ka mundur t’i gjejë ato në qytetin e Vlorës. Nga detajet e policisë bëhet e ditur se pasi kishin helmuar prindërit e tyre dhe motrën e madhe, vajzat i kishin vënë flakën shtëpisë dhe ishin larguar në këmbë natën, duke fjetur fillimisht në një hotel në Durrës, më 16 korrik.

Të nesërmen ato ishin nisur me autobus drejt Vlorës, ku dhe pasi kanë kontaktuar me një agjenci imobiliare kanë marrë një banesë me qira. Vajzat nuk dilnin shpesh nga shtëpia dhe frekuentonin vende me shumë njerëz që të mos identifikoheshin. Policia thekson se ato nuk kanë punuar në asnjë klub nate dhe nuk janë shfrytëzuar nga askush.

Ndyshimet fizike të vajzave nga fotografitë e bëra publike kanë bërë që puna e policisë të vështirësohej pasi indentifikimi i tyre ishte i vështirë.

Ndërkaq, nga hetimet rezulton se letra që kishin lënë në shtëpi ishte shkruar nga vajza e vogël. Prindërit e tyre pretendonin se ato kishin marrë 400 mijë lekë të reja dhe 800 euro. Por motrat kanë deklaruar se kishin marrë vetëm 200 mijë lekë të reja dhe 300 euro. Me vete atyre u janë gjetur 100 mijë lekë të reja dhe 100 euro.

Mbi dy motrat rëndojnë akuzat e shkatërrimit të pronës dhe vjedhjes së kryer në bashkëpunim.