Gjykata e Lushnjës dënon me 9 vjet burg Liza Tabakun dhe me 3 vjet të birin

Gjykata e Lushnjës ka dënuar me 9 vite burg ish-drejtoreshën e Drejtorisë Arsimore, Liza Tabaku. Po ashtu, është dënuar me tre vjet burg dhe djali i saj, Xhonluko Tabaku.
Liza Tabaku u akuzua për shpërdorim detyre dhe korrupsion pasiv të personave që ushtrojnë funksione publike, në rrethana rënduese, më shumë se një herë. Ndaj djalit të saj, Xhonluko Tabaku rëndoi akuza e ushtrimit të ndikimit të paligjshëm ndaj personave që ushtrojnë funksione publike.

Gjithashtu, me një vit burg është dënuar dhe Rigert Zeneli, në akuzën e ushtrimit të ndikimit të paligjshëm ndaj personave që ushtrojnë funksione publike. Të tre personat janë gjykuar në masën e arrestit me burg, ndërsa procesi është zhvilluar me gjykim të shkurtuar, pasi ata kishin pranuar akuzat.
Ish-drejtoresha e Drejtorisë Arsimore të Lushnjës u arrestua në nëntor të vitit të kaluar. Sipas hetimeve, Tabaku merrte 3 mijë deri në 5 mijë euro për çdo emërim apo moslargim nga detyra të mësuesve.