Gjyqi ndaj Frrokut, realizohet testi i kërkuar nga mbrojtja, por “fiton” akuza
Nisi pasditen e djeshme dhe përfundoi në mbrëmje eksperimenti i kërkuar nga avokatët mbrojtës të Arben Frrokut, personi i akuzuar për vrasjen e kryekomisarit Dritan Lamaj më 24 shkurt 2013.
Një automjet tip “Mercedes Benz” i llojit ML, në drejtimin e të cilit ishte dy përfaqësues të Prokurorisë së Krimeve të Rënda u nis në orën 18:30 nga vendi ku ndodhi vrasja e kryekomisar Lamajt në drejtim të Kapshticës.
Burime nga organi i akuzës, bëjnë të ditur se testi ka përfunduar rreth orës 21:15, që tregon se automjetit i janë dashur rreth 2 orë e 45 minuta për të përshkuar aksin në fjalë.
Sipas provave të paraqitura nga organi i akuzës, ditën e vrasjes Arben Frroku u filmua në pikën e kalimit kufitar të Kapshticës në orën 21:27, duke kaluar kufirin për në Greqi.
Ndërsa avokatët mbrojtës të Frrokut e konsideronin të pamundur përshkimin e gjithë kësaj rruge për 2 orë e 57 minuta dhe kjo, deri më sot, ka qenë pika kryesore e mbrojtjes së tyre.
Për këtë arsye, ata paraqitën në gjykatë kërkesën për kryerjen e këtij eksperimenti, për të vërtetuar nëse ishte e mundur që aksi rrugor Tiranë-Kapshticë të përshkohet brenda këtij harku kohor.
Kushtet e sotme të motit kanë qenë të njëjta me ato të datës 24 shkurt 2013, kjo e provuar nga Shërbimi Meteorologjik, ndërsa ndryshimi i vetëm ka qenë ai i markës së makinës, që në rastin e Frrokut ishte një “BMW” e serisë X5.
