Gjyqi ndaj Shullazit, kërkohen si dëshmitarë Tahiri dhe Nikolla
Ka marrë zhvillime të reja çështja e gjyqit ndaj Emiljano Shullazit dhe bandës së tij. Në kuadër të hetimeve, Prokuroria për Krime të Rënda ka kërkuar të thërrasë 38 dëshmitarë, në procesin për kërcënimin e rektorit Myny Koni.
Mësohet se Prokuroria ka vendosur të thërrasë ish-ministrin e Brendshëm Saimir Tahiri, ish-ministren e Arsimit Lindita Nikolla, kreun e Policisë së Shtetit Haki Çako, ish-drejtorin e Policisë së Tiranës Ervin Hodaj si dhe rektorët Dhori Kule dhe Mynyr Koni.
Dy ish ministrat janë paraqitur edhe më herët në Prokurorinë për Krimet e Rënda për llogari të hetimit ndaj Emiljano Shullazit.
Ata dhanë deklarime në lidhje me vënien në dijeni nga ana e pedagogëve Mynir Koni dhe Dhori Kule për kërcënimin e tyre nga një grup personash gjatë fushatës së zgjedhjes së rektorit të Universitetit të Tiranës, në prill të vitit 2016.
Para prokurorëve, Tahiri e Nikolla kanë pohuar se dy pedagogët kanë pranuar se janë kërcënuar, por nuk kanë përmendur emrin Emiljano Shullazit.
Sipas Prokurorisë, dy akademikët janë kërcënuar në datat 14 dhe 15 prill të vitit të kaluar nga katër persona për tërheqjen nga gara të kandidatit Koni.
Përveç akuzës për kanosje për shkak të detyrës kundër Dhori Kules dhe Mynyr Konit, Emiljano Shullazi, Gilmando Dani, Endri Qyqja, Endri Zela dhe Blerim Shullazi, akuzohen nga Krimet e Rënda edhe për gjobëvënie në tre episode, duke vepruar si pjesë e një grupi të strukturuar kriminal.
