Greqi, miratohen reformat e pensioneve dhe tatimtaksave
Pas një seance dyditore tepër të tensionuar, Parlamenti grek ka miratuar me 153 vota pro dhe 143 kundër, nga 296 deputetë të pranishëm në sallë, dy projektligjet e diskutueshme të pensioneve dhe tatimtaksave, që do të sjellin masa me vlerë prej 5.4 miliardësh në këmbim të paketës financiare të ndihmës për vendin, në 3 vitet e ardhshme.
Kryeministri Tsipras ka mbrojtur reformat e qeverisë së tij, duke thënë se masat nuk prekin rreth 93% të popullsisë, ndërsa është kritikuar ashpër nga të gjithë udhëheqësit e tjerë të partive opozitare.
“Ne jemi të vendosur me çdo kusht, që ta bëjmë Greqinë të qëndrojë përsëri me këmbët e saj dhe për të thyer këtë nyje të korrupsionit, që ka qenë në pushtet për gjithë këto vite dhe që udhëhoqi vendin drejt falimentimit”, tha Aleksis Tsipras, kryeministër i Greqisë.
“Çfarë bën ky projektligj që keni sjellë në Parlament? Rrit taksat dhe kontributet e sigurimeve shoqërore, duke çuar – me saktësi matematikore, – në shmangien e taksave dhe në evazion fiskal. Masat që ju propozoni përbëjnë, për fat të keq, gurin e varrit për çdo rritje të mundshme për ekonominë greke”, tha Kyriakos Mitsotakis, kreu i “Demokracisë së Re”.
Projektligji në fjalë ka ndeshur në kundërshtimin e ashpër të sindikatave greke, që shpallën një grevë 48-orëshe fundjavën e kaluar, ndërsa para votimit që mbaroi pas mesnate, protestues anarkistë kanë hedhur bomba molotov ndaj policisë në sheshin para Parlamentit, e më pas konfrontimet janë zhvendosur në lagjen “Eksarqia” të kryeqytetit.
Me votimin e dy reformave të kërkuara, sot ministri grek i Financave shkon në samitin e rëndësishëm të Eurogrupit në Bruksel, me shpresën të nënshkruajë marrëveshjen me huadhënësit e Greqisë, duke hapur edhe bisedimet për reduktimin e borxhit dhe duke bërë të mundur lëvrimin e ndihmës ekonomike, për të shmangur një pamundësi detyrimesh financiare, që Athina ka në muajin korrik ndaj huadhënësve të saj, FMN dhe BQE.
