IKMT kallëzon penalisht kreun e Bashkisë së Peshkopisë, Ilir Krosi, lejoi 7 ndërtime pa leje

Inspektorati Kombëtar i Mbrojtjes së Territorit ka paditur penalisht një tjetër kryebashkiak. Këtë radhë bëhet fjalë për një përfaqësues të Partisë Demokratike, kryetarin e Bashkisë së Peshkopisë, Ilir Krosi.

Krosi është kallëzuar me akuzën e shpërdorimit të detyrës së bashku me kryeinspektorin aktual të Inspektoratit të Mbrojtjes së Territorit të bashkisë Peshkopi, Gafur Gazidede si dhe ish-kryeinspektorët e këtij inspektorati, Halil Zhuka dhe Dilaver Drizi.

IKMT ka kërkuar nga institucionet e drejtësisë edhe marrjen e masë së pezullimit nga detyra për kryebashkiakun dhe kryeinspektorin e Inspektoratit të Mbrojtjes së Territorit në bashkinë e Peshkopisë.
“Janë të paktën shtatë raste, kur këta shtetas nuk kanë vepruar sipas parashikimeve ligjore në fuqi për ndalimin e punimeve të kundërligjshme të kryera në territorin e bashkisë së Peshkopisë, duke shkaktuar me mospërmbushjen e detyrimeve të tyre ligjore, dëmtimin e territorit”, thuhet në njoftimin e IKMT.