Inkursionet ruse, SHBA dërgon avionë mbikëqyrës në Islandë

Duke demonstruar angazhimin për një Europë të lirë dhe të sigurtë, SHBA dislokoi 12 avionë “F15” dhe rreth 350 trupa në Islandë e Holandë. Kjo lëvizje bëhet pas disa inkursioneve ruse në hapësirën ajrore islandezë, diçka që ka rritur tensionin mes Moskës dhe NATO-s.

Forcat ajrore amerikane thanë se, këto avionë do të marrin pjesë në misione mbikëqyrjeje në Islandë dhe në manovra stërvitore në Holandë. Avionët “F15” nuk janë grupi i vetëm që po dërgohen në Europë, në një përpjekje për të ndalur agresione të mëtejshme ruse në rajon.

SHBA do të dërgojë edhe avionë të tjerë në Finlandë për të përforcuar aleatët e NATO-s, sidomos pas ndërhyrjes ruse në Ukrainë. Megjithëse ka një forcë të vogël rojesh bregdetare, Islanda është vendi i vetëm i NATO-s që nuk ka ushtri.

Gjatë Luftës së Ftohtë, SHBA-të kishin një bazë ajrore në Islandë, e cila përbënte një pikë strategjike në mes të Atlantikut. Baza u mbyll në vitin 2006 dhe, megjithëse kontrolli ajror mbi vend bëhej nga NATO, kjo e fundit nuk ka arritur të ndalë inkursionet sporadike ruse në hapësirën ajrore islandeze.

Ekspertët thonë se, Rusia ka shtuar misionet e saj me avionë luftarakë, bombardues dhe nëndetëse në veriun e Atlantikut dhe kjo do të thotë se, prania e NATO-s atje është e domosdoshme.