INSTAT: Italia, partneri kryesor tregtar

Importet e mallrave nga Italia në Shqipëri, gjatë muajit prill të vitit 2016 u rritën me 5.6 për qind, duke arritur në 14.5 miliardë lekë, kur në prill të një viti më parë u importuan 13.7 miliardë lekë.

Edhe eksportet shënuan rritje prej 22.7 për qind gjatë muajit prill. Nga të dhënat e INSTAT-it rezulton se Italia vazhdon të mbetet partneri kryesor tregtar i vendit. Referuar statistikave, eksportet e Shqipërisë drejt Italisë në prill 2016, llogariten 11.5 miliardë lekë. Në të njëjtën periudhë të një viti më parë eksportet nga Italia llogariten 9.3 miliardë lekë.

Sipas INSTAT-it, me Italinë, shkëmbimet tregtare zënë 39.5 për qind të totalit. Si katërmujor importet nga Italia llogariten 52.2 miliardë lekë, ndërsa eksportet 43.2 miliardë lekë.

Në vlerën e lartë të mallrave të importuara nga shteti fqinj, vendin kryesor e zënë grupi i mallrave “tekstile dhe këpucë”. Importi i kësaj kategorie arriti për periudhën katërmujore, janar-prill vlerën e 12.6 miliardë lekëve.

Ndërsa grupi i dytë me peshë në totalin e importeve për periudhën katërmujore ishte grupi “makineri, pajisje dhe pjesë këmbimi” për industritë e reja dhe për rinovimin e atyre ekzistuese nga sipërmarrësit privatë shqiptarë, por dhe italianë që ushtrojnë aktivitet në Shqipëri. Importi i kësaj kategorie arriti për këtë periudhë vlerën e 10.5 miliardë lekëve. Ndërsa importet nga grupi ‘minerale dhe lëndë djegëse dhe energji elektrike” arritën në vlerën 5.6 miliardë lekë.

Në vlerën e mallrave të eksportuar drejt shtetit fqinj, vendin kryesor e zë grupi “tekstile dhe këpucë”. Eksporti i kësaj kategorie arriti për periudhën janar-prill vlerën e 28.5 miliardë lekëve. Ndërsa eksportet e grupit “materiale ndërtimi dhe metale” në katërmujorin e parë të këtij viti shënuan vlerën e 4 miliardë lekëve.