INUK sot në njësinë nr.5 për prishjen e ndërtimeve pa leje

Inspektoriati Ndërtimor Urbanistik Kombëtar ka rinisur mëngjesin e sotëm aksionin në Tiranë për prishjen e ndërtimeve pa leje dhe lirimin e hapësirave publike.

Aksioni i INUK, ditën e sotme do të përqëndrohet në njësinë nr.5 në zonën e Tiranës së Re, përkatësisht nga Vasil Shanto dhe deri në kryqëzimin e Komunës së Parisit.

Ndërkohë ditën e djeshme, aksioni i INUK çoi në prishjen e objekteve të paligjshme në zonën e njësisë 5 në Tiranë, nga Pallati me Shigjeta në drejtim të Vasil Shantos.

Mjetet e INUK kanë goditur 94 objekte ku përfshihen, platforma betoni, shtesa pallatesh me funksion biznese, lokale dhe dyqane. Në ditët në vijim aksioni do të vazhdoj në Komunën e Parisit, në zonën e NSHRAK -ut dhe Shallvaret.

INUK ka falenderuar qytetarët për bashkëpunimin e deritanishem, duke i kërkuar edhe ndjesë për bllokimet e herë pas hershme të trafikut.

Nga ana e saj INUK shpreh vullnetin për të vijuar aksionin, ndërsa kërkon bashkëpunimin edhe të qytetarëve dhe pronarëve të ndërtimeve pa leje.