ISIS zgjeron rrezen e veprimit, lëshon tre raketa ndaj Izraelit
ISIS vazhdon ta zgjerojë sferën e veprimit e së fundi, grupi islamik i lidhur me të në Egjipt, i vetëquajtur provinca Sinai, deklaroi se pikërisht nga ky gadishull ka lëshuar tre raketa drejt Izraelit.
Akti, sipas drejtuesve të tij, është një lloj shpagimi ndaj mbështetjes që vendi hebre i jep ushtrisë egjiptiane. Autoritetet izraelite pohuan se dy raketa kanë rënë në jug të vendit, por nuk kanë shkaktuar as viktima në njerëz e as dëme materiale.
Që prej ditës së mërkurë, nga luftimet e ashpra në veri të gadishullit të Sinait kanë gjetur vdekjen 17 ushtarë egjiptianë e rreth 100 militantë të shtetit islamik.
Përplasjet nisën pas një mësymje të koordinuar të ekstremistëve në qytetin e Sheikh Zuweid-it, një prej sulmeve më të mëdha të këtij lloji të organizuara ndonjëherë nga xhihadistët në këtë territor.
Pas përmbysjes së presidenti islamik Mohamed Mursi korrikun e vitit 2013, militantët i intensifikuan ndjeshëm goditjet e tyre në rajonin e trazuar e që prej atëherë, në përplasjet me ta llogaritet të jenë vrarë të paktën 600 pjestarë të forcave të armatosura dhe atyre të policisë egjiptiane. Izraeli ndan një kufi prej 240 km me gadishullin e Sinait. Shteti hebre e akuzon Hamasin që kontrollon Gazën, se i ka ofruar mbështetje organizatës, provincë e Sinait, gjë të cilën lëvizja islamike palestineze nuk e ka pranuar ndonjëherë. Pohimet për lëshimin e raketave të llojit Grad, grupi në fjalë i shoqëroi me deklaratën se ato ishin hedhur në “Palestinën e pushtuar”.
