Jacobson: Formimi i institucioneve, çështje e brendshme e Kosovës

Ambasadorja amerikane, Tracey Ann Jacobson, edhe njëherë ka ripërsëritur se bashkësia ndërkombëtare dhe as ambasada amerikane nuk do të ndërhyjë në zgjidhjen e ngërçit politik në Kosovë, ngase sipas saj, ky është një proces i brendshëm politik i një vendi të pavarur.

Sipas saj, kanë kaluar tre muaj nga mbajtja e zgjedhjeve dhe është interesim i madh i Bashkësisë Ndërkombëtare në përgjithësi, por edhe i qytetarëve, që t’i shohin deputetët duke i çuar proceset përpara dhe në interes të shtetit të Kosovës dhe të mos angazhohen për politika partiake e të njëanshme.

Jacobson theksoi si shumë të rëndësishme po ashtu vazhdimin e dialogut me Serbinë, pastaj integrimin evropian, miratimin e ligjit për luftëtarët në trevat e huaja…, për të cilat siç u shpreh ajo, do të vazhdohet të punohet me institucionet e reja sapo të themelohen.

Jacobson, këto komente i bëri sot gjatë ceremonisë së përurimit të shkollës ‘Musa Hoti’ në Mitrovicë.