Jugu i shtrin dorën Veriut

Në kohën kur tensionet rreth tij kanë mbërritur në pikën kulmore, Presidenti i Koresë së Jugut vendos t’i mëshojë diplomacisë.

Pak ditë pasi Veriu komunist shqetësoi seriozisht komunitetin ndërkombëtar me testimin e një rakete balistike ndërkontinentale, Moon Jae-ini shprehet i gatshëm për një takim kokë më kokë me Kim Jong unin, “kurdo dhe kudo” që të jetë, nëse rrethanat e lejojnë.

Nga Berlini, ku ndodhet për të marrë pjesë në bisedimet e G20, Moon u shpreh se ribashkimi i Gjermanisë Lindore dhe asaj Perëndimore e mbushin me shpresën se paqja do të mund të arrihet edhe në Gadishullin Korean.

“Koresë, kombit të fundit të përçarë në këtë planet, eksperienca e bashkimit të Gjermanisë i ushqen besimin se bashkimi do të vijë edhe për të. Në të njëjtën kohë, ajo na tregon më së miri rrugën që duhet të ndjekim”, tha Moon Jae-in.

Linja e Moon i bën jehonë të ashtëquajturës “politikë e kohës së mirë”, e ndjekur kundrejt Penianit edhe nga ish-Presidenti Roh Moo-hyun. Lëshimin e raketës së fundit koreano-veriore, Moon Jae-in e përshkroi si zhgënjyes dhe të nxituar.

“Kemi arritur pikën më të lartë të një rrethi vicioz përshkallëzimi ushtarak, e kjo e bën nevojën e dialogut më të ngutshme se kurrë ndonjëherë më parë”, u shpreh ai. Pozicioni në të cilin gjendet Presidenti i Koresë së Jugut nuk është i lehtë. Nga njëra anë po përpiqet ta mbajë të hapur mundësinë e bisedimeve, ndërsa nga ana tjetër përballet me presionin e aleatit më të fuqishëm të Seulit, Shteteve të Bashkuara, për një përgjigje shumë më të ashpër ndaj shtetit fqinj.