Kartelet e drogës komunikojnë përmes rrjetit Sky, Abazoviç: Të përfshirë edhe nga Kosova

“Problemi më i madh këtu ishte se nuk kemi mundur të luftojmë deep state-in, nuk arritëm të ndërrojmë të gjithë administratën apo sistemin gjyqësor, por i nisëm proceset. Kështu, filluam luftën kundër kontrabandës së cigareve, biznesi më i madh që ka bërë Mali i Zi në 30 vjet e fundit e që llogaritet në 500 milionë euro në vit”, –u shpreh ai.

“Ka njerëz përtej kufijve që nuk janë të kënaqur me këto rezultate sepse një pjesë e cigareve ka shkuar nëpër Rozhajë, ka dalë edhe në Kosovë, një pjesë lidhet edhe me njerëz në veri të Kosovës”, – vazhdoi ish kreu i qeverisë malazeze. Ai foli dhe për rrjetin ‘Sky’, të krijuar nga Europoli. “Shumica e karteleve të drogës ka komunikuar aty me atë aplikacion. Në momentin që karteli në Europë u rrit aq shumë dhe kjo krijoi pasiguri për qytetarët e BE-së, Europoli e hapi këtë rrjet”, ndërsa shtoi se pjesë e rrjetit “Sky” janë edhe persona nga Kosova.

“Nuk e di me numra por ka edhe shumë njerëz nga Kosova që janë pjesë e këtij rrjeti. Ka njerëz nga Kosova që janë të lidhur edhe me kontrabandën me cigareve, por nuk mund të them se nga cila sferë janë ata” – u shpreh ai.