Kerry telefonon Lavrov: Ndihma ushtarake për Assad, minon luftën kundër terrorizmit

Sekretari amerikan i Shtetit, John Kerry zhvilloi një bisedë telefonike me homologun rus, Sergey Lavrov në përpjekjen e radhës për të sqaruar synimet ushtarake të Moskës në Siri.

Kerry paralajmëroi se mbështetja për Assad-in mund të përshkallëzojë dhe të tejzgjasë konfliktin civil në Siri.

Shtetet e Bashkuara akuzojnë Rusinë për rritje të prezencës së saj ushtarake në Siri. Moska nuk e ka mohuar këtë fakt. Përkundrazi, së fundmi po del gjithnjë e më hapur, madje duke u bërë thirrje edhe vendeve të tjera që t’i bashkohen përpjekjeve të saj në ndihmë të Assad-it. Këtë kërkesë, Putin dhe zyrtarët e tjerë të lartë në Moskë e argumentojnë me pretendimin se po ndihmojnë në luftën kundër ekstremistëve islamikë.

Rusia ka rritur prezencën e saj me trupa dhe armatime në brigjet e Latakias, në një kohë kur regjimi i Assad-it po humbet terren ndaj grupeve rebele.

Besohet se telefonata e Kerry-Lavrov ishte e treta brenda 10 ditëve. Departamenti i Shtetit njoftoi se Sekretari i Shtetit paralajmëroi homologun rus se “mbështetja ndaj Presidentit Assad po minonte qëllimin e përbashkët në luftën kundër ekstremizmit dhe përpjekjet ndërkombëtare për të gjetur një zgjidhje politike për konfliktin”.

Lëvizjet e fundit të Moskës janë komentuar edhe ngë Shtëpia e Bardhë. Zëdhënësi, Josh Earnest e përshkroi mbështetjen e Rusia ndaj Assad-it si një “bast të humbur”.

Analistët mendojnë se ndihma ruse ndaj regjimit të Damaskut, nuk duhet parë si tregues i besnikërisë së saj ndaj një aleati, por si një mundësi që Moska synon të shfrytëzojë për forcuar rolin e vet në politikën globale.