Kina fillon ndërtimin e një gazsjellësi në Azinë Qendrore

Presidenti kinez, Xi Jinping, do të inagurojë këtë javë në Taxhikistan ndërtimin e një gazsjellësi të ri që do t’i mundësojë Pekinit të përforcojë furnizimet me gaz nga Azia Qendrore, sipas disa burimesh diplomtaike taxhikistaneze.

Fillimi i punimeve është parashikuar të nisë të shtunën pas një mbledhje të Organizatës për Bashkëpunim në Shangai ku mblidhen ish-republikat e Azisë Qendrore, Kina dhe Rusia, njoftoi ministri taxhikistanez i Punëve të Jashtme.

Ky gazsjellës, që do të vihet në punë duke filluar nga viti 2016, pritet të furnizojë 30 miliardë metra kub gaz në vit nga Taxhikistani drejt Kinës, duke përforcuar livrimet ekzistuese mes dy vendeve fqinje që kryhen nëpërmjet një gazsjellësi që hyri në funksionim në vitin 2009.

Kina, ku kërkesa e brendshme për energji është në rritje të vazhdueshme, përpiqet të shfrytëzojë burimet e shumta në naftë dhe gaz të Azisë qendrore. Ajo kërkon gjithashtu të projektojë influencën e saj politike në një rajon strategjik të dominuar prej dekadash nga Rusia.