“Askujt nuk i shkonte ndërmend që Shqipëria, vendi i vogël përtej Adriatikut, i goditur vetëm pak muaj më parë nga tragjedia e tërmetit shkatërrimtar, të mund të gjente forcën e resurset e të dërgonte një ekip mjekësor prej 30 vetësh, për t’i qëndruar pranë mikes së vjetër e të shtrenjtë të të gjithë shqiptarëve, Italisë”.
Kështu nis mesazhin e saj drejtuar Kryeministri Edi Rama, mjekja Kozeta Proko, e cila punon në një prej spitaleve të Trevizos në Itali.
“Dita e re, këtu në provincën e Trevizos, të gjithë shqiptarëve, në veçanti ne mjekëve shqiptarë qe jetojmë e punojmë në Itali, na gjeti krenar”, shprehet Proko, pas vendimit të qeverisë shqiptare e cila nisi drejt vendit fqinj Italisë një ekip prej 30 mjekësh e infermierësh për t’i ardhur në ndihmë në përballjen me COVID-19.
Mjekja shprehet se “këta kolegë, me punën e tyre në shërbim të mbrojtjes së jetës, janë dëshmi e një prej cilësive më fisnike të popullit shqiptar… ndihmesën e mikut në ditë të vështira”.
Ajo thekson se “në çastet më të errëta të dallgëve të historisë, ne shqiptarët kemi treguar virtytet tona më të mira”.
“Jemi duke jetuar ditë të vështira, në një betejë që kërkon sakrificë prej secilit prej nesh.
Nëse këta kolegë kanë lënë pas familjet e shtëpitë e tyre, në emër të betimit të shenjtë në mbrojtje të jetës, ju lutem të gjithë ju të tjerëve të qëndroni në shtëpi”, vijoi ajo mesazhin e saj.
Mjekja kërkon që të kemi të gjithë besim tek masat mbrojtëse të menjëhershme që institucionet e Shqipërisë ditën të ndërmerrnin, të cilat i përgëzoj.
“Për të mirën tonë, të familjarëve e të afërmve tanë, në respekt të sakrificës e punës së gjithë mjekëve, që fitorja e kësaj beteje të jetë sa më e afërt… qëndroni në shtëpi”, shprehet Proko.
Bravi! Bravissimi!
Evviva gli albanesi. Grazie!