Konsullata e Italisë prezanton Kodin Civil Italian përkthyer në shqip

Konsullata e Përgjithshme e Italisë në Vlorë, në bashkëpunim me Universitetin “Ismail Qemali” në këtë qytet, do të promovojë Kodin Civil Italian, përkthyer në gjuhën shqipe nga Lisenko Moçka.

Përkthimi i këtij volumi, sipas organizatorëve, vlerësohet si një përpjekje e suksesshme për  t’u ardhur në ndihmë juristëve, studiuesve, profesorëve të së drejtës, apo avokatëve, noterëve e prokurorëve.

Nga ana tjetër, ky përkthim vlerësohet edhe si një kontribut në procesin e njohjes së  legjislacionit civil evropian e të vendeve të tjera të zhvilluara dhe të përafrimit të sistemit të të drejtës së vendit tonë me këtë legjislacion.

Ky promovim bëhet edhe më kuptimplotë, nisur nga fakti që Italia konsiderohet si atdheu dhe vendi i të drejtës, por edhe si avokat i prioriteteve të Shqipërisë në procesin e integrimit evropian.

Italia është vendi fqinj me të cilin na lidh historia dhe një miqësi shumëshekullore, partner kryesor në shkëmbimet dhe investimet në një masë më shumë se 40 për qind etj.

Këto çështje vlerësohen si elementë të rëndësishëm në bashkëbisedimin që do të zhvillohet me këtë rast me studentë dhe pedagogë të Universitetit “Ismail Qemali”, të Vlorës.