Polonia motivon kombëtaren para ndeshjes me Shqipërinë, 4.2 mlionë dollarë për kualifikimin

Federata Polake e Futbollit ka vendosur të shpërblejë kombëtaren e vet në rast kualifikimi për në fazën finale të Botërorit 2026. 4.2 milionë dollarë do ta marrin futbollistët e kombëtares, në rast se do të mundin Shqipërinë dhe më pas skuadrën që do të dalë nga çifti Ukrainë-Suedi.

Polonia do të presë Shqipërinë më 26 mars, në sfidën gjysmëfinale të fazës Play-Off të vlefshme për finalet e Botërorit të Futbollit 2026. Një ndeshje e vlerësuar tepër e rëndësishme për të dyja skuadrat, ku kërkohet fitorja me çdo kusht. Përpara kësaj sfide, Federata Polake e Futbollit ka vendosur të motivojë lojtarët me një bonus prej 4.2 milionë dollarësh, nëse kombëtarja arrin të kualifikohet në fazën finale të botërorit.

Lajmin për shpërblimin e federatës e publikoi në platformën X gazetari polak Mateusz Ligęza i radio ZET.

“Nëse Polonia shkon në Kupën e Botës, lojtarët e ekipit kombëtar do të marrin një bonus shumë të madh nga Federata Polake e Futbollit, 4.2 milionë dollarë. NJë shumë e konsiderueshme kjo që përbën, afërsisht 40% të shumë prej 10.5 milionë dollarëve të garantuar që FIFA do t’u paguajë pjesëmarrësve në fazën e grupeve të Kupës së Botës”, – nënvizoi gazetari polak.

Nëse Polonia mposht Shqipërinë, do të përballet më pas me fituesin e çiftit Ukrainë-Suedi për të prerë biletën përfundimtare që e dërgon në finalet e botërorit. Për ndeshjen kundër Shqipërisë, trajneri Jan Urban do të shpallë listën e futbollistëve të grumbulluar më 20 mars.