Moody’s rikonfirmon vlerësimin “Ba3” për Shqipërinë me perspektivë të qëndrueshme

Agjencia ndërkombëtare e vlerësimit të kreditit Moody’s Ratings, në rishikimin e saj periodik të kryer më 5 mars 2026, ka rikonfirmuar vlerësimin afatgjatë të kreditit sovran të Shqipëria në nivelin “Ba3” me perspektivë “të qëndrueshme”.

Sipas vlerësimit të Moody’s, ekonomia shqiptare paraqet qëndrueshmëri dhe pritet të vijojë me ritme të moderuara rritjeje. Agjencia parashikon një rritje reale të PBB-së prej rreth 3,6% për vitin 2025 dhe 3,5% për vitin 2026. Kjo ecuri pritet të mbështetet kryesisht nga performanca e sektorit të turizmit, nga fluksi i qëndrueshëm i investimeve të huaja direkte – veçanërisht në energji dhe turizëm – si dhe nga rritja e pjesëmarrjes në tregun e punës.

Në aspektin fiskal, raporti vëren se zbatimi i buxhetit gjatë vitit 2025 ka mbetur relativisht i kujdesshëm. Moody’s vlerëson se deficiti arriti në rreth 1,8% të PBB-së në vitin 2025, nga 0,7% që ishte një vit më parë, por mbetet ende nën objektivin prej 2,4%.

Sipas projeksioneve të agjencisë, raporti i borxhit publik ndaj PBB-së pritet të ulet gradualisht në rreth 51% në vitin 2027, nga rreth 52,6% që vlerësohet për vitin 2025. Kjo pritet të mbështetet nga rritja ekonomike dhe nga një bilanc primar fiskal i balancuar ose paksa pozitiv. Në horizontin tre deri në pesëvjeçar, parashikohet një rënie e mëtejshme graduale e borxhit publik.

Perspektiva “e qëndrueshme”, sipas Moody’s, tregon se rreziqet pozitive dhe negative për vlerësimin “Ba3” mbeten të balancuara. Agjencia pret që reformat e lidhura me procesin e integrimit evropian të vazhdojnë, megjithëse me ritëm gradual, ndërsa rreziqet që lidhen me likuiditetin e sektorit publik dhe stabilitetin e sistemit bankar pritet të mbeten të kontrolluara.

Rikonfirmimi i këtij vlerësimi konsiderohet një tregues i stabilitetit makroekonomik dhe i vazhdimësisë së reformave strukturore në vend, duke dhënë një sinjal pozitiv për investitorët ndërkombëtarë dhe për perspektivën afatgjatë të integrimit evropian të Shqipërisë.