Kore e Jugut, ish-presidentja merret në pyetje për korrupsion

Presidentja e shkarkuar e Koresë së Jugut po merret në pyetje nga prokurorët në lidhje me skandalin e korrupsioni që e lëvizi nga detyra.

Kur mbërriti në zyrën e prokurorit, Park Geun hye u tha gazetarëve se i vinte keq për veprimin e saj. “Më vjen keq për njerëzit. Do të bashkëpunoj me besnikëri gjatë marrjes në pyetje”, tha ajo.

Zonja Park u rezistoi përpjekjeve për ta pyetur gjatë kohës që ishte presidente, por ajo humbi imunitetin sapo gjyqtarët mbështetën vendimin e parlamentit për ta hetuar.

Tani ajo mund të akuzohet për favorizim të njerëzve të afërt të saj për të zhvatur para nga firmat e mëdha. Mikesha e ngushtë e ish-presidentes, Choi Soon sil është akuzuar gjithashtu për ryshfet dhe korrupsion.

Prokurorët pritet të mbajnë zonjën Park në zyrën e tyre për një seancë maratonë marrjeje në pyetje, që pritet të zgjasë deri në orët e vona të natës.

Një nga avokatët e saj deklaroi se, një mjek do të kontrollojë herë pas here shëndetin e Park, pasi gjendja e saj nuk është e mirë.

Ditën e martë, mbështetësit e ish-presidentes u mblodhën jashtë shtëpisë së saj në periferi të Seulit dhe brohoritën në momentin kur ajo doli për t’u shoqëruar nga policia. Njerëzit valëvisnin flamurin koreano-jugor, simbol i lëvizjes pro-Park.