Korrupsioni, arrest me burg ish-kryeregjistruesit të Hipotekës në Fier
Gjykata e Fierit ka konsideruar të ligjshëm urdhërin e ndalimit të Prokurorisë për ish-Kryeregjistruesin e Hipotekës së këtij qyteti, Aleksandër Myrtaj, i akuzuar për veprën penale të “korrupsionit pasiv…”, si edhe për topografin, Kastriot Rakipaj, i akuzuar për “korrupsion aktiv…”.
Ne seancën e zhvilluar sot, gjykata vendosi masën e sigurisë “arrest me burg” për Myrtajn dhe “detyrim paraqitje” për Rakipajn. Këta dy shtetas janë ndaluar të mërkurën.Bashkë me këta dy shtetas, ditën e premte, në zbatim të urdhërit të prokurorit, është ndaluar edhe një tjetër zyrtar i Hipotekës Fier, shtetasi Altin Malaj, për akuzën “korrupsion aktiv…”. Seanca për vlerësimin e urdhërit të ndalimit për këtë shtetas pritet të zhvillohet ditën e nesërme.
Në bazë të hetimeve të deritanishme të Prokurorisë së Fierit, të nisura në Maj 2014, ka dyshime të arsyeshme se këta persona kanë kryer veprime korruptive në procedurat e regjistrimit të pasurive të paluajtshme, rifreskimit në kartelat e pasurive dhe pasqyrimet e ndryshimeve në lidhje me to. Rezulton gjithashtu se aktet korruptive shtetasi Aleksander Myrtaj i kryente kryesisht në ambjentet e zyrës ku ushtron detyrën. Nga veprimet hetimore, kanë rezultuar veprime korruptive (dhënie parash në zarf) kryeregjistruesit Aleksandër Myrtaj, nga ana e personave të ndryshëm, përfshirë edhe shtetasi Kastriot Rakipaj (topograf) dhe Altin Manaj, specialist në Hipotekë.
