Kosovë-Gjermani, bashkëpunim në ngritjen e Akademisë së Drejtësisë

Ministri kosovar i Drejtësisë, Hajredin Kuçi, priti sot në takim drejtorin e Akademisë së Drejtësisë së Gjermanisë, Stefan Tratz dhe përfaqësuesit e Deutsche Gesellschaft für Internationale Zusammenarbeit (GIZ).

Drejtori i Akademisë së Drejtësisë së Gjermanisë Tratz, falënderoi ministrin Kuçi për bashkëpunimin e ofruar dhe në emër të Akademisë së Drejtësisë në Gjermani shprehu gatishmërinë për të rritur edhe më tej përkrahjen për sistemin e drejtësisë në Kosovë.

Në këtë takim u diskutua rreth përvojave të ndryshme në fushën e drejtësisë dhe së bashku shqyrtuan mundësinë e bashkëpunimit në bazë të përvojave nga Gjermania me fokus të veçantë në trajnimin e gjyqtarëve. Në këtë kontekst, fokus i veçantë iu dha trajnimit të gjyqtarëve dhe prokurorëve për trajnime specifike që do të ndihmonin në profilizimin e tyre.

Drejtori i Akademisë Tratz dhe përfaqësuesit nga GIZ, shprehën gatishmërinë e tyre për përkrahje të themelimit të Akademisë së Drejtësisë në Kosovë dhe njëherit theksoj se ky do të jetë një hap i rëndësishëm për sistemin e drejtësisë në vend.

Ministri Kuçi e falënderoi GIZ për bashkëpunimin e vazhdueshëm me Ministrinë e Drejtësisë dhe përkrahjen që kanë ofruar për sistemin e drejtësisë në Kosovë dhe përafrimin me standardet evropiane.