Kryemadhi: Politikanët të zhvishen nga imuniteti, t’i nënshtrohen të parët Vetingut
Kryetarja e LSI-së, Monika Kryemadhi, deklaroi dje se politikanët duhet të jenë të zhveshur nga imuniteti dhe të jenë të parët që duhet t’i nështrohen Vetingut.
E ftuar në mbrëmjen e së henes në INTV, Kryemadhi u shpreh se “Klasa politike duhet të jetë e shkëputur nga imuniteti, sepse politikanët duhet të jenë të parët që duhet t’i nështrohen Vetingut”.
E pyetur për bashkëqeverisjen me Ramen dhe përgjegjesinë për kanabizimin, Kryemadhi tha se “Përgjegjësia e LSI-së është dhe ne i marrim përgjegjesitë tona, por ministria e Brendshme kishte përgjegjesinë kryesore”.
Kryemadhi solli si argument ndarjen me PS për shkak se u akuzuan se LSI po bllokonte reformën në drejtësi. “Më pas u akuzuam se nuk duam reformën në drejtësi dhe kjo nuk është e vërtetë, pasi LSI ka qenë dhe është për reformën në drejtësi”, tha Kryemadhi.
Ajo vleresoi punën e mirë të qeverisë përsa i përket sektorit të bujqësisë apo integrimit të Shqipërisë në Bashkimin Europian. “Ne vlerësojmë punën e qeverisë përsa i përket bujqësisë, integrimit të vendit, si dhe mbajmë përgjegjësi për ato që nuk u bënë mirë”, tha Kryemadhi.
