Kurti ndan nga 100 euro për çdo pensionist dhe fëmijë me rastin e festave të fundvitit

Fëmijët dhe pensionistët në Kosovë do të marrin nga 100 euro shtesë këtë fundvit. Kështu tha kryeministri Albin Kurti në mbledhjen e Qeverisë. Qeveria pritet ta miratojë sot këtë vendim.

“Besoj ju kujtohet premtimi që çdo vit secili fëmijë do të përfitojë 50, 100 apo 150 euro, varësisht nga të ardhurat e prindërve. Sivjet kemi vendosur që të gjtihë fëmijët pa dallim të përfitojnë nga skema dhe shuma e përfitimit të jetë 100 euro”, tha Kurti.

LEXO EDHE:
KAFE SHQETO/ Vasili: Mbështetësi dhe promovuesi i korrupsionit është Rama

Ai tha se po planifikojnë “që kjo skemë të sofistikohet edhe më tutje, duke filluar zbatuimin edhe të deklarimit të të ardhurave vjetore nga të gjithë prindërit përfitues”. Kjo, sipas Kurtit, “që të ketë dallim në mbështetje” dhe që “ata që kamë më pak të ardhura, të përfitojnë më shumë”.

“Për të gjithë pensionmarrësit këtë fundvit, me qëllim të lehtësimit të kostos së jetesës për këtë kategori të cenueshme, do të miratojmë shtesën e njëhershme prej 100 eurove, përveç pensionit të rregullt mujor që marrin”, tha Kurti.

Ministria e Financave do të njoftojë për detajet rreth ekzekutimit të shtesave.