Kushtetuesja shqyrton ankesën e PD-së ‘Për Gjykatën Administrative’

Gjykata Kushtetuese po shqyrton sot kërkesën e Partisë Demokratike që kërkon shpalljen si të papajtueshëm me Kushtetutën të disa ndryshimeve në ligjin “Për Gjykatat Administrative”.
Ky pr/ligj, i miratuar nga maxhoranca më 31 korrik, në seancën e fundit të sesionit parlamentar, i njeh të drejtën qeverisë që të emërojë ndihmësat ligjorë të gjyqtarëve.
Në një prononcim për mediat deputeti i PD-së, Eduard Halimi, tha se ligji i ankimuar bie ndesh me parimet kushtetuese të ndarjes së pushteteve. “Ky ligj i le zbuluar qytetarët shqiptarë në mbrojtjen e barabartë që duhet të kenë para ligjit, pasi gjykata administrative është ajo me të cilën qeveria ka konflikt të hapur interesi” tha Halimi.
Shpresojmë, vijoi ai, që Gjykata Kushtetuese të mos bjerë pre e qeverisë, por të qëndrojë në anën e parimeve dhe standardeve kushtetuese, duke e shpallur antikushtetues ligjin në fjalë.